Mediat e "Kazanit", si ja dhanë minoritares greke Rita Wilson, privilegjin e të qënit çame.

Si e bënë çame, greken minoritare mediat e Kazanit

Nga : Abedin Rakipi

Prej 2 ditësh portale jo pak të njohura shqiptare publikuan me bujë lajmin se aktorja e famshme e Hollywood-it Rita Wilson paska zbuluar origjinën e saj çame. Dhe për ta bërë këtë ju mjaftoi vetëm një deklaratë e aktores ku ajo thotë se nëna e saj e ka origjinën nga një fshat kufitar mes Greqisë e Shqipërisë, dhe se e jëma është arratisur nga fshati i saj gjatë luftës se dytë botërore. 

Asnjë nga gazetarët e këtyre portaleve nuk e verifikoi këtë lajm me ata njerëz që e njohin pak më thellë historinë e Çamërisë dhe gjenealogjinë e familjeve dhe fiseve çame, siç janë Ibrahim Hoxha, Arben Llalla, Abedin Rakipi, Selman Sheme, Hajredin Isufi etj... As portali mediatik 27.al i fokusuar në çështjen çame nuk e botoi këtë lajm. Mediat serioze u drejtohen njerëzve seriozë. Ky është kodi i artë i gazetarisë. Dhe kjo sepse Çamëria ka historianët dhe studiuesit e vetë seriozë dhe rigorozë në shkencën e historisë që nuk mund ti lejojnë vetes gafa të tilla.

Emri dhe mbiemri i vërtetë i Rita Wilsonit është Rita Ibrahimoff. Ajo ka lindur nga një baba, pomak mysliman nga Bullgaria i cili quhej Hassan Ibrahimoff, lindur në vitin 1920 . Ai u arratis nga Bullgaria për në SHBA për shkak të persekutimeve që Bullgaria i bënte pomakëve turkofonë në territorin e saj. Për arsye të panjohura kur arriti në SHBA ai ndërroi emrin e tij nga Hassan Ibrahimoff në Allan Wilson. Ndoshta për ti shpetuar përdjekjeve të shërbimit sekret bullgar.

Ndërsa e jëma e Rita Wilson është Dorotea Xheko e tjetërsuar fillimisht në Dorothy Genkos në SHBA e më pas në Dorothy Wilson. Ajo ka lindur në fshatin Sotir të Dopullit të sipërm, i banuar 100% nga minoritarë grekofonë dhe nuk ka lidhje fare me Çamërinë dhe çamët. Ajo është 100% greke dhe këtë e dëshmon edhe aktiviteti i ngjeshur që zhvillon vajza e saj Rita Wilson për përhapjen e kulturës, historisë dhe ortodoksisë greke. Ajo ështe mike e ngushtë me Nicolas Gage (Nikolaidis Gaxhojanis), lindur në fshatin Lia të Filatit në Çamëri, koka e lobit grek në SHBA dhe një armik i përbetuar i çështjes çame dhe shqiptarëve.

Mjafton të kontrollosh aktivitetin e ngjeshur pro-grek që ka bërë Rita Wilson gjate gjithë jetës së saj për të kuptuar se Rita Wilson është në kampin e Nicholas Gage, në mbrojtje të tezës së Vorio-Epirit dhe nuk është aspak çame, përkundrazi....

Por siç ka thënë edhe mbreti Polidor i Spartës : “Nëse adhuron armikun, je i humbur. Nëse merr fenë e armikut je i skllavëruar. Nëse përzien gjakun me armikun, je i shkatërruar.”

 E ne çamët na kanë mësuar që mos ti adhurojmë armiqtë tanë, qofshin ata edhe Hollywoodianë...

Çamëria ka njerëzit e vetë të famshëm si Hasan Tahsinin që duhen 100 Rita Wilson për ta barazuar andaj gazetarë te dashur bëhuni pak me seriozë herës tjetër, konsultohuni me studiuesit dhe historianët e afirmuar të Çamërisë, dhe mos i jepni atyre që nuk e kanë, privilegjin e të qënit çam.